Nepal Press News

पहिलो हाफमा नेदरल्यान्ड्स र सेनेगल १-० गोलले अगाडि

दोहा । कतार विश्वकपअन्तर्गत समूहगत चरणको आफ्नो अन्तिम खेलमा अहिले नेदरल्यान्ड्सले कतार र सेनेगलले इक्वेडरसँग खेलिरहेको छ।

पहिलो हाफको समाप्तीमा नेदरल्यान्ड्स र सेनेगल १-० गोलले अगाडि रहेका छन्। कतारविरुद्ध नेदरल्यान्ड्सले २६ औँ मिनेटमा अग्रता लिएको थियो। कोडी गाक्पोले २६ औँ मिनेटमा गोल गरेका हुन्। यस्तै इक्वेडरविरुद्ध सेनेगलले ४४ औँ मिनेटमा अग्रता लिएको छ।

समूह एमा २ खेलबाट नेदरल्यान्ड्स र इक्वेडरको चार चार तथा सेनेगलको तीन अंक रहेको छ। यी खेल जितेको अवस्थामा नेदरल्यान्ड्स र सेनेगल दुवै प्रिक्वाटरफाइनल पुग्नेछन्।

गगनको घरमा दुई महामन्त्रीको बधाई साटासाट

काठमाडौं । नेपाली कांग्रेसका महामन्त्रीद्वय विश्वप्रकाश शर्मा र गगन थापाले बधाई साटासाट गरेका छन् । उनीहरुले भर्खर सम्पन्न निर्वाचनमा विजयी बनेकोमा एकअर्कालाई बधाई दिएका हुन् । उनीहरबीच थापाको घरमै बधाई आदानप्रदान भएको हो ।

शर्माले सामाजिक सञ्जाल फेसबुकमा थापासँगको तस्बिर सेयर गर्दै लेखेका छन्, ‘जुटौं, अब एकएक गरेर, जितौं अग्रजहरुको पनि विश्वास, सम्हालौं संयमले कमान्ड, भरौं देशमा नवीन आत्मविश्वास ।’

शर्माले गगनलाई विजयी बनेलगत्तै बधाई दिँदै आफूले संसदीय दलको नेता हुँदै प्रधानमन्त्रीका लागि प्रस्ताव गर्ने भन्दै पोस्ट गरेका थिए । थापा काठमाडौं ४ बाट निर्वाचित बनेका हुन् भने शर्मा झापा १ बाट संसद प्रवेश गरेका हुन् ।

 

समानुपातिकमा कांग्रेसभन्दा करिब डेढ लाख मतले एमाले अगाडि, अरू दल कसले कति ल्याए ?

काठमाडौं । मंसिर ४ गते सम्पन्न आम निर्वाचनको मतगणना अन्तिम चरणमा छ । तीन स्थानबाहेक मतगणना करिब सम्पन्न भइसकेको छ । त्यस्तै, समानुपातिकतर्फ पनि गणना उत्तराद्र्धतिर पुगेको छ ।

पछिल्लो विवरणअनुसार समानुपातिक गणनामा नेकपा एमाले नेपाली कांग्रेसभन्दा करिब डेढ लाख मतले अघि छ ।

एमाले २६ लाख ९० हजार ७८० मतसहित अग्रस्थानमा रहँदा कांग्रेस २५ लाख ४३ हजार ६६६ मतले पछ्याइरहेको छ । एमाले र कांग्रेसबीच एक लाख ४७ हजारको मतान्तर छ ।

त्यस्तै, तेस्रो स्थानमा रहेको नेकपा माओवादी केन्द्रले ११ लाख ४३ हजार १२१ मत प्राप्त गर्दा राष्ट्रिय स्वतन्त्र पार्टीले १० लाख ९७ हजार ९८० मत ल्याएको छ ।

राष्ट्रिय प्रजातन्त्र पार्टीको पाँच लाख ६९ हजार १७५, जनता समाजवादी पार्टीको तीन लाख ८७ हजार ५३७, जनमत पार्टीको तीन लाख ४५ हार ६७३ मत हुँदा नेकपा एकीकृत समाजवादीले दुइृ लाख ८१ हजार २७ मत प्राप्त गरेको छ ।

 

सुनसरी ४ मा सञ्चारमन्त्री कार्कीले मतान्तर बढाउँदै

काठमाडौं । सुनसरी ४ को प्रतिनिधिसभामा सत्ता गठबन्धनबाट नेपाल कांग्रेसका उम्मेदवार सञ्चारमन्त्री ज्ञानेन्द्र बहादुर कार्कीले मतान्तर बढाएका छन् ।

मतगणनाको पछिल्लो मत परिणामअनुसार कार्कीले २४ हजार ५६१ मत ल्याएका छन् । नेकपा एमालेका जगदीश कुसियतले २४ हजार ३३७ मत ल्याएका छन् । कार्की कुसियतभन्दा २२४ मतले अगाडि छन् ।

यस क्षेत्रमा शनिबार साँझदेखि स्थगित गणना आज दिउँसोदेखि सुरु भएको हो ।

 

 

पत्रकार राईको मुद्दा काउन्सिललाई जिम्मा दिन आग्रह

काठमाडौं । नेपाल पत्रकार महासघ र प्रेश काउन्सिल नेपालले पत्रकार गजेन्द्र राईविरुद्ध नेपाल प्रहरीले चलाएको कारबाही कानुनविपरीत भएको भन्दै यो प्रेश काउन्सिलको अधिकार क्षेत्रभित्र पर्ने यसैअनुसार हेरिदिन आग्रह गरेको छ । मंगलबार सरकारी वकिलको कार्यलय बबरमहल पुगेर सहन्यायधिवक्ता अच्यूचकृण न्यौपानेलाई भेट्दै काउन्सिल अध्यक्ष बालकृष्ण बस्नेत, काउन्सिल सदस्य दिपक पाण्डे, नेपाल पत्रकार महासघका अध्यक्ष विपुल पोखरेल, महासचिव रोशन पुरीलगायतले यस्तो आग्रह गरेक हुन् ।

भेटमा उनीहरुले पत्रकार राईको मिडिया आधिकारिक रुपमा प्रेश काउन्सिलमा दर्ता भएर सञ्चालनमा रहेको तथ्य राख्दै आधिकारिक ढंगबाट सञ्चालित मिडियामा आएको सामाग्रीलाई लिएर प्रहरीले कारबाही अघि बढाउनु उचित नभएको बताए । ‘मिडियामा आएको कन्टेन्टको विषयमा चित्त नबुझेमा त्यसविरुद्धको समाधान खोज्ने बाटो प्रेस काउन्सिल हो’, भेटमा काउन्सिल अध्यक्ष बस्नेतले भने, ‘काउन्सिलले गरेको कार्वाही चित्त नबुझे अदालती प्रक्रियामा जाने वा अन्य निकायमा जाने बाटो खुला छ । तर यस्तो कानुनी व्यवस्था विपरीत साईबर क्राईम अन्तर्गतको कानून लगाएर पत्रकारहरुलाई तर्साउन खोजिराखिएको छ । यस्तो हुनु राम्रो हैन ।’

भेटमा पत्रकार महासंघका अध्यक्ष विपुल पोखरेलले पछिल्लो पटक साईबर क्राइमअन्तर्गतको कानुन लगाएर पत्रकारहरुलाई श्रृङ्लावद्ध पक्राउ गर्ने क्रम बढिरहेकोमा चिन्ता व्यक्त गर्दै यसले देशको लोकतान्त्रिक व्यवस्था र प्रेस स्वतन्त्रतामाथि नै आघात पुग्ने बताए । बस्नेतले काउन्सिलले उचित कार्वाही गरेपछि गल्ति गर्ने पत्रकारहरु स्वयं पेशाबाट अलग्गिनु परेको तथ्यसमेत रहेको बताउँदै प्रहरीले जुनसुकै विषयलाई पनि साईवर क्राइमअन्तर्गत अघि बढाउनु उचित नभएको बताए ।

महासंघका महासचिव रोशन पुरीले पत्रकार गजेन्द्र राईको विषयमा प्रहरी संगठनभित्रैका एक अधिकृतको व्यक्तिगत रीसइवि पनि जोडिएको जानकारीमा आएको उल्लेख गर्दै एक जना व्यक्तिको कारण सिंगो संगठनलाई बद्नाम गराउनेगरी प्रहरी लाग्न नहुने बताए । काउन्सिल सदस्य पाण्डेले काउन्सिलले उचित कार्वाही गरेपछि गल्ति गर्ने पत्रकारहरु स्वयं पेशाबाट अलग्गिनु परेको तथ्यसमेत रहेको बताउँदै प्रहरीले काउन्सिलको क्षेत्राधिकारभित्र पर्ने विषयलााई साईवर क्राइमअन्तर्गत अघि बढाउनु उचित नभएको बताए ।

पत्रकारका नेतृत्वदायी संस्थाहरुलाई जवाफ दिँदै सहन्यायधिवक्ता न्यौपानेले यसबो सम्पूर्ण विवरण आफू मातहत आएपछि मात्र केहि भन्न सकिने बताए ।

पत्रकार राईलाई आफैंले सञ्चालन गरेको अनलाईन पत्रिकामा प्रकाशित भएको समाचार र भिडियोकोे विषयलाई लिएर शुक्रबार प्रहरीको साईबर व्यूरोले घाइघाटबाट पक्राउ गरेको छ । हाल उनलाई साईबर व्यूरोले दरबारमार्ग प्रहरी कार्यलयको हिरासतमा राखेको छ । पत्रकार राईको रिहाइको माग गर्दै नेपाल पत्रकार महासंघ, आदिवासी जनजाति पत्रकार महासंघ, किरात राई पत्रकार संघलगायतले विज्ञप्ति जारी गरेका छन् ।

स्याङ्जा २ र बाजुरामा मतगणना सुरु गर्न आयोगलाई कांग्रेसको पत्र

काठमाडौं । सत्तारुढ नेपाली कांग्रेसले स्याङ्जा २ र बाजुरामा रोकिएको मतगणना प्रक्रिया अघि बढाउन आग्रह गर्दै निर्वाचन आयोगलाई पत्र लेखेको छ ।

कांग्रेसका मुख्य सचिव कृष्णप्रसाद पौडेलले यस्तो पत्र लेखेका हुन् । सबै मतपेटिकाहरु सुरक्षित रुपमा मतदान अधिकृतले प्रक्रियागत रुपमा बुझाइसकेको अवस्था देखिएका, कानुनी प्रक्रिया पूरा गरी कागजातसहित मतदान अधिकृतले ल्याएको मतपेटिकाहरु कांग्रेस, एमालेसमेतका प्रतिनिधिको रोहोवरमा निर्वाचन अधिकृतको कार्यालयले बुझी भरपाई गरिदिएको पृष्ठभूमिमा आयोगको छानबिन टोलीे त्यस क्षेत्रको सबै वा कुनै पनि निर्वाचन रद्द गराउन नसक्ने अवस्था देखिएको ठहर गर्दै कांग्रेसले गणन प्रक्रिया अघि बढाउन माग गरेको हो ।

कांग्रेसले स्याङ्जा २ र बाजुराको निर्वाचन अधिकृतको कार्यालयलाई मतगणना अघि बढाउन पत्र लेखेको हो । त्यस क्षेत्रमा तनाव उत्पन्न भएपछि आयोगले छानबिनका लागि टोली गठन गरेको छ । कांग्रेसले यसको विरोध गरेको हो ।

‘कांग्रेसले भोट नहालेको भए माओवादी र एसले यति सीट पनि जित्ने थिएन’

कैलाली । मङ्सिर ४ गते सम्पन्न निर्वाचनको अन्तिम परिणाम आउन बाँकी छ । तर, अहिले सम्म प्रत्यक्ष तर्फ कांग्रेसले ५३ क्षेत्र जित्दा एमालेले ४३ क्षेत्र जितेको छ । समानुपातिकमा कांग्रेस भन्दा एमाले अगाडि छ ।

सत्ता गठबन्धनमा रहेको माओवादीले १७, नेकपा एकीकृत समाजवादीले ७, लोसपाले ४ र जनमोर्चाले १ क्षेत्र जितेको छ । सत्ता गठबन्धनले निर्वाचनमा प्रत्यक्षबाटै सरकार सञ्चालन गर्ने बहुमत ल्याउने दाबी गरिरहेका बेला अहिले समानुपातिक मत जोड्दा पनि बहुमत (१३८) पुर्‍याउन सकस भइरहेको छ ।

गठबन्धन हुँदा कांग्रेसको परिणाम पनि चित्तबुझ्दो छैन । तर, सन्तोष मान्न सकिन्छ । माओवादी केन्द्रको परिणाम भने निराशाजनक छ । निर्वाचन परिणामपछि माओवादी केन्द्रका अध्यक्ष पुष्पकमल दाहाल प्रचण्डले निर्वाचनमा गठबन्धनले सोचे जस्तो परिणाम नआएको बताइसकेका छन् ।

प्रचण्डले गोरखामा आफू निर्वाचित भएको प्रमाणपत्र बुझ्दै यस विषयमा गठबन्धनमा सामेल दलहरूबीच छलफल गर्ने समेत उल्लेख गरे । माओवादी महासचिव देव गुरुङले पनि गठबन्धनको विषयमा समीक्षा हुन आवश्यक रहेको बताइसकेका छन् । उनी एमालेका उपमहासचिव पृथ्वीसुब्बा गुरुङसँग पराजित भए ।

निर्वाचनको परिणामले सन्तुष्ट नरहेको माओवादीका कारण आगामी सरकार गठनका विषयमा नयाँ समीकरण हुन सक्ने आशङ्काहरू पलाएका छन् । तर, सत्ता गठबन्धनको नेतृत्व गरिरहेको कांग्रेसका प्रवक्ता प्रकाश शरण महत भने अहिलेकै गठबन्धनले सरकारमा पनि निरन्तरता पाउनेमा विश्वस्त छन् ।

माओवादी मात्र नभई आफ्नो पार्टीको समेत मत घटेकोमा चिन्ता व्यक्त व्यक्त गर्ने महत आगामी सरकारकारे नेतृत्व कांग्रेसले गर्ने दाबी गर्छन् ।

प्रस्तुत छ, कांग्रेस प्रवक्ता महतसँग निर्वाचनको परिणाम, सत्ता गठबन्धनको अगामी दिशा र भावी प्रधानमन्त्रीका विषयमा गरिएको कुराकानी नेपाल टकमा ।

अहिलेको जनमतलाई कांग्रेसले कसरी लिएको छ ?

हाम्रो अपेक्षा अनुसार नआए पनि हामी नेतृत्वको गठबन्धनको बहुमत पुग्छ । यो बहुमतको म्यान्डेटलाई हामी उपयोग गर्छौँ । हामी देश र जनताको भावना अनुसार अघि बढ्छौँ ।

परिणाम चित्त बुझ्दो भएन भन्ने कुरामा बढी चित्त दुखाइ छ कि, जसोतसो सरकार बनाउन सक्छौँ भन्नेमा उत्साहित हुनुहुन्छ ?

मैले भनिहाले नि हाम्रो अपेक्षा अनुसार परिणाम आएन । त्यो स्पष्ट छ । तर, पनि बहुमत प्राप्त भएको छ । यसमा पनि सन्तोष गर्नु पर्छ ।

गठबन्धनकै बहुमत पुर्‍याउन पनि सकस छ नि ! १३८ पुराउन अरू कसलाई मिलाउनु हुन्छ ?

पर्दैन । पुग्छ । अरू समर्थन दिन चाहनेहरूलाई त किन रोक्ने कुरा आयो र हैन ? समर्थन त स्वागत गर्ने कुरा नै हो । तर, गठबन्धनकै बहुमत पुग्छ ।

निर्वाचन परिणामले माओवादी त रुष्ट छ नि । तपाईँहरूले किन धोका दिनुभएको ?

हामी कसैले कसैलाई धोका दिएका छैनौँ । सहरी युवा मतदाताहरूबाट हामीलाई धेरै ठुलो अपेक्षा थियो । तर, स्थापित दलहरूले उनीहरूको अपेक्षा पुरा गरेनन् भन्ने मानसिकता देखियो । त्यसको परिणाम स्वरूप राष्ट्रिय स्वतन्त्र पार्टीको नाममा मत गएको देखिन्छ ।

दल प्रतिको अविश्वास भन्दा पनि हामीसँग भएको ठुलो अपेक्षा पुरा भएन भनेर सन्देश दिन खोजेको जस्तो लाग्छ ।

त्यो अनुसार हाम्रो प्रत्यक्ष मात्र होइन समानुपातिक मत पनि त्यहाँ गएको छ । त्यस कारण यहाँ कसैले कसैलाई दोष दिने ठाउँ छैन । हाम्रो समानुपातिक मत पनि हाम्रो पार्टीमा ल्याउन सकेनौँ भने प्रत्यक्षमा कसले कसलाई दिने भन्ने कुरामा कसरी नियन्त्रण गर्न गर्न सकिन्छ । जहाँ सम्म पार्टी नेतृत्वको कुरा छ त्यसलाई हदै सम्म मत ट्रान्सफर होस् भनेर हामीले कोसिस गरेका हौँ ।

कांग्रेसको हकमा अपेक्षा गरेको जस्तो परिणाम नआए पनि निराशाजनक त छैन नि । तर, माओवादीलाई त पुरै सक्दिनु भयो भन्ने आरोप छ ?

हामीले मत नहालेको भए उहाँहरूले (माओवादी केन्द्र) यति पनि सिट जित्न सक्नु हुने थिएन । समाजवादी दलले कहाँबाट १० वटा सिट जित्थ्यो र ? समाजवादी दल जित्नुमा पनि कांग्रेस माओवादीको हात छ । त्यो कुरा उहाँहरूले पनि बुझ्नु भएको छ ।

माओवादीको मात्र होइन सहरी क्षेत्रमा हाम्रो पनि त पराजित भएको छ । जस्तो चितवनका तिनै क्षेत्रमा हाम्रो उम्मेदवार हार्नु भयो । काठमाडौँमा मत भार ज्यादा भएको ठाउँमा हामीले समाजवादी र माओवादीलाई सिट दिएका थियौँ । त्यसलाई मतदाताहरूले स्वाभाविक रूपमा लिएनन् ।

प्रत्यक्ष मात्रै होइन समानुपातिकमा नै कांग्रेसलाई मत नहालेको देखियो । पहिला प्रत्यक्षमा मात्रै अन्तर्घातको रोग थियो । अहिले पनि अन्तर्घात देखिएको छ नत्र धेरे ठाउँमा हामी जित्ने थियो । अहिले नयाँ कुरा कट्टर काङ्ग्रेसबाटै कांग्रेसको समानुपातिकमा मत नगएको देखिएको छ ।अन्त दिएको स्थिति छ ।

कांग्रेसले ‘तरमाराहरु’लाई समानुपातिकमा राखेको हुँदा मत धेरै मत नआएको भन्ने पनि छ नि । तपाईँ पनि समानुपातिकमा हुनुहुन्छ । तपाईँहरूकै अनुहार देखेर समानुपातिक मत कम आएको हो ?

(आक्रोशित हुँदै) को तरमारा ? मैले तरमारेको छु ? म कहिले देखी कांग्रेसमा छु , कति योगदान ? यो विषयमा सबैले बुझ्न आवश्यक छैन ?

तरमारेको भनेको के हो ? संघर्षकाल देखी लगातार काम गर्दै जनतामा केन्द्रित भएर आइरहेका छौँ । प्रत्यक्षमा नुवाकोटमा आफ्नो ठाउँमा लड्न खोजेको थिए । गठबन्धन भएको कारणले लडिन । कसरी तपाइ तरमारा भन्नुहुन्छ ?

केही प्रवृत्ति हाम्रो पार्टी भित्र पनि छ। अनावश्यक प्रचार गर्नेहरू छन् । पहिला पनि अन्तर्घात हुने गरेको प्रत्यक्षमा अहिले त समानुपातिकमा पनि भयो । समस्या त्यो हो ।

सुदूरपश्चिममा प्रतिनिधिसभा तर्फ माओवादी शून्य भयो । तपाइहरूले एक क्षेत्र मात्रै हार्नुभयो । अनि माओवादीलाई कांग्रेसले मत दिनुभएन भन्ने त प्रस्टै छ नि ?

माओवादीको मात्र होइन हाम्रो पनि घटेको छ ।

काठमाडौँमा माओवादी शून्य भयो । तपाईँहरूले ५ क्षेत्र जित्नु भयो । यहाँ पनि धोका भएन त ?

हाम्रो समानुपातिक मत हेर्नु भएको छ ? ललितपुरमा जम्मा ८–९ हजार मात्र मत आएको छ । पम्फा जी लडेको ठाउँमा । त्यति मात्रै मत हो र हाम्रो ? चितवनमै आएको छैन । समानुपातिकमा मत आएको छैन प्रत्यक्षमा हाम्रै साथीहरू पनि हार्नु भएको छ ।

यही गठबन्धनले सरकार बनाउँछ भन्ने तपाइको तर्क हो ?

हो त्यही हुन्छ ।

अबको प्रधानमन्त्री को बन्नुहुन्छ त ?

स्वाभाविक रूपमा अहिलेकै नेतृत्वले निरन्तरता पाउँछ ।

गगन थापा पनि संसदीय दलको नेताको लागि गृहकार्य गरिरहनु भएको छ । प्रधानमन्त्री बन्नुहुन्छ त ?

लड्न पाइहाल्नु हुन्छ नि । प्रतिस्पर्धा गर्न पाइहाल्नु हुन्छ नि । ज–जसको चाहना छ प्रतिस्पर्धा गर्न पाइहाल्नु हुन्छ नि । सबै सांसदहरूको विश्वासबाट नेता बन्ने कुरा हो सबै सांसदहरूले विश्वास गरे नेता हुन पाइहालिन्छ नि ।

माओवादीले नेतृत्व गर्न सक्दैन, पाउँदैन त अहिले ?

अहिले यो कुराको छलफल भइरहेको छ । तर, स्वाभाविक रूपले सरकारको नेतृत्व नेपाली कांग्रेसको हो । इच्छा सबैको हुन सक्छ माओवादीको पनि होला अरूको पनि होला । त्यो छलफलबाट टुङ्गो लाग्छ ।

सरकारको नेतृत्व माओवादीले पाएन भने निर्वाचनमा पनि धोका दियो भन्दै काङ्ग्रेस बाहेक सरकारमा एमालेसँग तालमेल गरेर जान सक्दैन जस्तो लाग्दैन ?

त्यस्तो लाग्दैन । यही गठबन्धनले निरन्तरता पाउँछ ।

डबल ह्याट्रिकपछि गच्छदारको ब्रेक, देउवाको नाममा मात्रै रह्यो अपराजितको रेकर्ड

कैलाली । सुनसरी–३ को अन्तिम मत परिणाम नआउँदा सम्म लगातार ३१ वर्ष देखी निरन्तर संसदीय निर्वाचनमा नहारेकाहरूको नाम थियो प्रधानमन्त्री तथा कांग्रेस सभापति शेरबहादुर देउवा र काङ्ग्रेसकै विजय कुमार गच्छदार ।

०४८ पछिका सबै चुनाव जित्ने रेकर्ड बनाएका गच्छदार यस पटक एमाले उम्मेदवार भगवती चौधरीसँग पराजित भए । गच्छदार पराजित भएसँगै देउवा मात्रै ०४८ देखी निरन्तर निर्वाचन जित्ने एक्ला नेता भए ।

सातौँ पटक गच्छदार सुनसरी ३ बाट ५ हजार १८८ मतान्तरमा पराजित हुँदा देउवा सातौँ पटक डडेल्धुराबाट १२ हजार ४९२ मतले विजयी भए ।

गच्छदारले २०४८, २०५१ र २०५६ को निर्वाचन काङ्ग्रेसबाट जितेका थिए। २०६४ मा मधेसी जनअधिकार फोरम र २०७० मा मधेसी जनअधिकार फोरम लोकतान्त्रिकबाट विजयी भए। २०७४ मा उनले फेरि काङ्ग्रेसबाट चुनाव जितेका थिए ।

२०७० मा तत्कालीन फोरम लोकतान्त्रिकबाट उम्मेदवार बनेका गच्छदारले भगवतीलाई पहिलो पटक पराजित गरेका थिए। त्यस बेला गच्छदारले १७ हजार ५ सय २४ मत पाउँदा चौधरीले १७ हजार १ सय ६२ मत पाइन्। जम्मा ३६२ मतको चुनावी हारपछि एमालेले गच्छदारले धाँधली गरेको आरोप लगाएको थियो।

उनले थप पहल केही गरिनन्। तर, २०७४ मा ३२१ मतले मात्रै पराजित भएपछि भने भगवती अदालत नै गइन्। तर, अर्को चुनावको नतिजा आइसक्दासम्म पनि उनको मुद्दा भने अझै विचाराधीन नै छ।

त्यस बेला गच्छदारले ३८ हजार ९ सय ७२ मत प्राप्त गरेर जित हात पार्दा भगवतीले ३८ हजार ६ सय ५१ मत पाएकी थिइन् । यस पटक भने सुरुदेखि नै यो क्षेत्रमा भगवती बलियो देखिएकी थिइन्।

गच्छदार हालसम्म दर्जनौँ पटक मन्त्री, उपप्रधानमन्त्री भए ।

गृहमन्त्रीदेखि प्रधानमन्त्रीसमेत भएका देउवा २०४८, २०५१, २०५६, २०६४, २०७०, २०७४ र २०७९ मा भएका सबै निर्वाचनमा विजयी भएका छन् ।

उनी पहिलो पटक २०४८ सालमा चुनाव जितेपछि उनी गिरिजाप्रसाद कोइराला नेतृत्वको सरकारको गृहमन्त्री भएका थिए। त्यसपछि २०५१ मा देउवा प्रधानमन्त्री बने। त्यसपछि देउवा पाँच पटक प्रधानमन्त्री भइसकेका छन्। उनी २०५२, २०५८, २०६१, २०७४, २०७८ मा गरी पाँच पटक प्रधानमन्त्री भएका हुन् ।

मधेस सरकारको जोड-घटाउ : जनमत र स्वतन्त्र सांसद निर्णायक

जनकपुरधाम । मधेश प्रदेशसभाको सबै नतिजा आएसँगै सरकार गठनको बहस सुरू भएको छ । चुनावको परिणामले भने सरकारको नेतृत्व सहज देखिएको छैन ।

मधेसमा १५ सीटमा जित निकालेर नेकपा एमाले पहिलो दल बनेको छ । चुनावमा एमाले-जनता समाजवादी पार्टी (जसपा)को गठबन्धन थियो । ०७४ मा ठूलो दल बनेको जसपा ९ सीटमा खुम्चिएर तेस्रोमा झरेको छ । एमाले र जसपाको सीट जोड्दा २४ पुग्छ ।

सत्ता गठबन्धनमा रहेका नेपाली कांग्रेस १३ सीट जितेर दोस्रो भएको छ । यो गठबन्धनमा रहेका लोसपा ७, माओवादी र नेकपा एसले ४/४ जितेका छन् । सत्तागठबन्धनमा रहेको दलहरूको सीट जोड्दा २८ पुग्छ ।

सिंगल भिडेको डा. सीके राउत नेतृत्वको जनमत पार्टीले ६ सीट जितेको छ । यस्तै प्रदेशसभामा ६ जना स्वतन्त्रले जितेका छन् ।

१०७ सदस्य प्रदेशसभामा ४३ जना समानुपातिक सांसद चुनिने छन् । समानुपातिकको नतिजा आइसकेको छैन । त्यसैले कुन दलको कति सांसद थपिन्छ यकिन छैन ।

सरकार बनाउन सामान्य बहुमत अर्थात् ५४ जना सांसद चाहिन्छ । अहिलेसम्मको प्रत्यक्षतर्फ र समानुपातिक परिणाम हेर्दा सरकार बनाउने बहुमत न सत्तागठबन्धन ल्याउन सफल भयो, न एमाले-जसपा गठबन्धन ।

सरकार बनाउनमा जनमत पार्टी र स्वतन्त्र सांसद निर्णायक बनेको छ । जनमत पार्टी सत्तागठबन्धनमा गयो भने सरकार बन्ने देखिन्छ । वा जनमत पार्टी र केही स्वतन्त्र सांसद-एमाले- जसपा गठबन्धनतिर लागेमा मात्र सरकार बनाउन सम्भव छ ।

जनमत पार्टी सरकारमा जाने/नजाने विषयमा मौन छ । तर, चुनावमा जनतालाई देखाएको विकासको सपना साकार पार्न जनमतले सरकारमा नगई सम्भव छैन । त्यसैले जनमत पार्टी सरकारमा जाने निश्चित छ, तर कुन गठबन्धन रोज्छ भन्ने कुरा तत्काल भन्न गाह्रो छ ।

एमालेका एक नेताले नेपाल प्रेससँग भने, ‘एमाले-जसपा गठबन्धनलाई जनमत पार्टीले साथ दियो भने सरकार बनाउन बहुमत पुग्ने हाम्रो अनुमान छ । तर, यो विषयमा अहिले छलफल भएको छैन । हेरौं, के हुन्छ ।’

मुख्यमन्त्री को- रामचन्द्र वा कृष्ण ?

एमाले-जसपा गठबन्धनमा एमालेको बढी सीट छ । यदि जनमत र स्वतन्त्र सांसदले सहयोग गरे एमालेले ठूलो दलको हिसाबले मुख्यमन्त्रीमा दाबी गर्न सक्छ ।

एमालेबाट विजयी भएकाहरूमध्ये अहिले कोही पनि मुख्यमन्त्रीका लागि खुलेका छैन । तर, धनुषाबाट प्रदेशसभा सदस्यमा विजयी रामचन्द्र मण्डलको चर्चा छ ।

मण्डल ०७४ मा माओवादीबाट चुनाव जितेर प्रदेशसभामा छिरेका थिए । उनी प्रमुख सचेतक पनि बने । पछि नेकपा एमाले र माओवादी एकीकरण भएर नेकपा बन्यो । नेकपा विघटन भई एमाले-माओवादी ब्युँतिएसँगै मण्डल एमालेमै बसे । एमाले रोजेकै कारण सांसद पद गुमाएका उनको कमब्याक भएको छ । त्यही भएर उनी मुख्यमन्त्रीको हकदार रहेको एमालेका एक नेता बताउँछन् ।

यता, जनमत पार्टीलाई आफ्नो पक्षमा तानेर सत्ता गठबन्धनले सरकार बनायो भने कांग्रेसबाट प्रदेशसभा सदस्यमा बाजी मारेका कृष्ण यादव मुख्यमन्त्री बन्ने सम्भावना बलियो छ । उनी नेपाली कांग्रेसका प्रदेश सभापति हुन् ।

हुन त कांग्रेसबाट जितेर दोस्रो पटक प्रदेशसभा छिरेका रामसरोज यादव पनि मुख्यमन्त्रीका दाबेदार छन् । पूर्वभौतिक पूर्वाधार विकास मन्त्रीसमेत रहेको उनको भने मुख्यमन्त्री सम्भावना कम छ ।

रामसरोजलाई कृष्णले पार्टीको प्रदेश सभापतिमा हराएका छन् । रामसरोज विमलेन्द्र निधीको समूहबाट र कृष्ण पार्टी सभापति शेरबहादुर देउवा समूहबाट प्रदेश सभापतिमा उठेका थिए । रामसरोजभन्दा कृष्ण पार्टी सभापति देउवाका नजिकका पात्र हुन् । त्यसैले कृष्णको सम्भावना बलियो छ ।

ओलीलाई बालेनको चेतावनी : सुकुम्वासीलाई कसैका विरुद्ध प्रयोग गर्ने कुचेष्टा नगर्नुहोला

काठमाडौं । काठमाडौं महानगरपालिकाका मेयर बालेन्द्र साहले एमाले अध्यक्ष केपी शर्मा ओलीको अभिव्यक्तिलाई लिएर तीव्र आक्रोश व्यक्त गरेका छन् । ओलीले आज एक कार्यक्रममा सुकुम्वासी वस्तिमा डोजर चलाउने महानगरपालिकाको आलोचना गरेका थिए ।

सामाजिक सञ्जालमार्फत बालेनले ओलीलाई आक्रोशित जवाफ दिएका हुन् । उनले अधिकार सम्पन्न बागमती सभ्यताको आग्रह र समन्वयमा महानगरले आफ्नो जिम्मेवारी पूरा गरेको बताएका छन् । ओलीबाट आएको धारणा सामान्य विषय भएको उनको भनाइ छ । ओलीले मन्त्री र प्रधानमन्त्री हुँदा सुकुम्वासी समस्यालाई सम्बोधन गर्न नसकेको आरोप साहले लगाएका छन् ।

‘२०४७ यता १४ वटा आयोग गठन हुँदा पनि काठमाडौँको सुकुम्वासी समस्या समाधान गर्न सक्नु भएन । मन्त्री र पटक–पटक त्यो पनि दुई तिहाइको सरकारको प्रधानमन्त्रीसम्म हुनुभयो, तर सुकुम्वासीले भोगेको ३२ वटा जाडो देख्नु भएन । सुकुम्वासीहरू तपाईँका लागि भोट बैङ्क मात्रै रहे,’ बालेनले भनेका छन् ।

सुकुम्वासीलाई गुठी आन्दोलनजस्ता आफ्नो स्वार्थ विपरीतका कुराहरूमा प्रयोग गरेको पनि उनको आरोप छ ।

उनी थप्छन्, ‘तपाईँलाई जनता, नदीनाला र नेवा सभ्यताको त्यत्रो माया भएको भए तपाईँको नेतृत्वमा लुँहिटी (सुनधारा) सक्काएर सेतो टावर किन ठड्याउनु भयो ? हनुमान ढोकाको पुनर्निर्माणमा नेवा सभ्यताको मौलिकता नासेर विदेशीलाई निर्माण गर्न दिने कार्यलाई कसरी अगाडी बढाउनु भयो ? यी सबै हेर्दा नेवा सभ्यता जोगाउने, नदी क्षेत्रको अतिक्रमण रोक्ने कार्यको तपाईँले विरोध गर्नु असामान्य होइन । ‘अब परिस्थिति फेरिएको छ । यसैले सकेको सहयोग गर्नुहोला, तर कसैका विरुद्धमा कसैलाई प्रयोग गर्ने कुचेष्टा नगर्नुहोला ।’

तेस्रो प्रयासमा यसरी सफल भयो विजयको अपराजित यात्रा रोक्ने भगवतीको भगीरथ प्रयत्न

इटहरी । सुनसरीमा नेकपा एमालेकी नेतृ भगवती चौधरीले पहिलोपटक नेपाली कांग्रेसका हेभीवेट नेता विजयकुमार गच्छदारलाई पराजित गरेकी छिन् । चौधरीले  ५ हजार १८८ मतान्तरमा गच्छदारलाई पराजित गरेकी हुन् ।

चौधरीले ४० हजार ७८८मत ल्याउँदा गच्छदार ३५ हजार ६०० मतमा रोकिए । तीन सय अन्तरले मात्रै चुनाव हार्दै आएकी चौधरीले यसपालि गच्छदारलाई  ५ हजार १८८ बढीको मतान्तरले हराएकी छन् ।

गच्छदारलाई चुनावमा पराजित गर्न चौधरीले तीन चुनाव कुर्नुपर्‍यो । गच्छदार उपप्रधानमन्त्रीसहित कैयौंपटक मन्त्री भइसकेका छन् । २०७० सालमा चुनावी डेब्यु गरेकी चौधरी राज्यमन्त्री भइसकेकी छन् । २०७० र २०७४ दुवै चुनावमा चौधरी गच्छदारसँग हारेकी थिइन् । तर, मतान्तर तीन सय हाराहारीमात्रै थियो । २०७० मा चौधरीले ३६२ मत नपुगेर गच्छदारसँग हार्दा २०७४ मा ३२१ मतले उपविजेता हुन पुगिन् ।

दश वर्षदेखि गच्छदारलाई चौधरीको चुनौती

सुनसरी क्षेत्र नम्बर ३ मा २०७० सालको चुनावमा चौधरीको अवतरण भएपछि गच्छदारलाई केही तनाव बढेको हो । त्यस अगाडिका २०४८, २०५१ र २०५६ सालको प्रतिनिधिसभा चुनावदेखि पहिलो संविधानसभासम्म गच्छदारले दह्राे जीत निकालिरहे । उनको राष्ट्रिय राजनीतिले पनि फड्को मार्दै गयो ।

दलको चुनाव चिन्ह फेरिए पनि, उनका प्रतिस्पर्धीहरु फेरिए पनि गच्छदार आफ्नो क्षेत्रको चुनावी विजेतामा तसमस पनि भएनन् । रुख, मसाल, नमस्तेसम्मका तीन फरकफरक चुनाव चिन्हमा लडेका गच्छदारले अहिलेसम्म ६ चुनाव जितेका छन् ।

२०४८ सालबाट चुनावी राजनीतिमा अवतरित गच्छदारले मन्त्रिपरिषदमा पनि त्यही वेलाबाट ठाउँ बनाएका थिए । उनले कृष्णप्रसाद भट्टराई, गिरिजाप्रसाद कोइराला, शेरबहादुर देउवा, प्रचण्ड, माधवकुमार नेपाल, बाबुराम भट्टराईदेखि केपी शर्मा ओलीसम्मको प्रधानमन्त्रीत्वकालमा मन्त्री तथा उपप्रधानमन्त्री भएको अनुभव लिएका छन् ।

२०४८ सालको गिरिजाप्रसाद कोइरालाको क्याबिनेटमा सञ्चार राज्यमन्त्रीबाट मन्त्रिपरिषदमा डेब्यु गरेका गच्छदार २०५२ सालको शेरबहादुर देउवाको क्याबिनेटमा ‘फुल मन्त्री’ भए । त्यसवेला उनले निर्माण तथा यातायात मन्त्रालयको नेतृत्व गरेका थिए । माधब नेपालको नेतृत्वको २०६६ सालको क्याबिनेटमा उनी उपप्रधानमन्त्रीमा बढुवा भए ।

त्यसपछि त उनी निरन्तर शक्तिशाली मन्त्रालय लिँदै उपप्रधानमन्त्री हुन भ्याए । २०७४ सालको चुनावसम्म राजाको प्रत्यक्ष शासनकाल र केही छिटफुटबाहेक हरेकजसो मन्त्रिपरिषदमा जोडिए । २०५५ सालमा उनी गिरिजाप्रसाद कोइरालाको प्रधानमन्त्रीत्वकालमा निर्माण तथा यातायातमन्त्री, २०५६ सालको कृष्णप्रसाद भट्टराईको प्रधानमन्त्रीत्वकालमा पर्यटन तथा नागरिक उड्ययनमन्त्री, २०५८ को शेरबहादुर क्याबिनेटमा जलस्रोतमन्त्री, २०६५ सालको प्रचण्डको प्रधानमन्त्रीत्वकालमा भौतिक योजना तथा निर्माणमन्त्री भएका थिए ।

२०६६ सालको माधव नेपालको प्रधानमन्त्रीत्वकालमा उपप्रधानमन्त्रीसहित भौतिक योजना तथा निर्माणमन्त्री, २०६८ सालको बाबुराम भट्टराईको क्याबिनेटमा उपप्रधानमन्त्रीसहित गृहमन्त्री, २०७० सालको केपी ओलीको प्रधानमन्त्रीत्वकालमा पहिलो वरियताको उपप्रधानमन्त्रीसहित भौतिक पूर्वाधार तथा यातायातमन्त्री भएका थिए गच्छदार ।

ओलीको पहिलो कार्यकालपछिको प्रचण्ड र देउवा दुवैको प्रधानमन्त्रीत्वकालमा पनि गच्छदार अटाए । पछिल्लो समयमा उनी २०७४ को देउवा क्याबिनेटमा उपप्रधानमन्त्रीसहित संघीय मामिला तथा स्थानीय विकासमन्त्री भएका थिए ।

नेपाली कांग्रेससँग पार्टी एकीकरण गरेर २०७४ को चुनाव जितेयता भने उनी क्याबिनेटमा छैनन् । सांसदको रुपमा पनि उनी निलम्बनमा परेका थिए । यद्यपि २०७९ को चुनावमा उनी पुनः उम्मेदवार भए ।

गच्छदारले कैयौंपटक क्याबिनेटमा बसेर सातौंपटकको संस्द यात्रामा उनलाई एमालेकी चौधरीले बाधा पु¥याएकी छन् । गच्छदारसँग तेस्रो किस्ताको चुनावी भिडन्तमा चौधरीले गच्छदारलाई पछारेरै छाडिन् । पहिलो संविधानसभाको समयमा झलनाथ खनालको मन्त्रिपरिषदमा एकपटक ३३ औं वरियतामा रहेर वन तथा भू-संरक्षण राज्यमन्त्री भएको बाहेक चौधरी कुनैपनि क्याबिनेटमा सहभागी छैनन् ।

चौधरीको जीतसँगै २०४८ सालबाट कांग्रेसदेखि मधेसवादी दलहरुबाट निरन्तर निर्वाचित भएर सांसद, मन्त्री र उपप्रधानमन्त्री भएका गच्छदारको संसद र सत्ता यात्रामा यसपटक विश्राम लागेको छ ।

गोकर्ण विष्टलाई सुन्तलाको माला

गुल्मी क्षेत्र नम्बर २ मा प्रतिनिधि सभा सदस्य पदमा निर्वाचित नेकपा एमालेका गोकर्ण विष्टलाई स्थानीय कृषकले फूलको मालाको सट्टामा सुन्तलाको माला लगाइ दिएका छन् ।

प्रतिनिधि सभा सदस्य पदमा निर्वाचित भएपछि मतदातालाई धन्यवाद दिन गाउँ गाउँमा पुगेका विष्टलाई फूलको माला लगाउने ठाउँमा सुन्तलाको माला लगाई दिएका हुन् ।

मङ्गलवार मतदातालाई धन्यवाद दिन रेसुङ्गा नगरपालिकाको वडा नम्बर–३ को भाडागाउँमा पुगेका विष्टलाई स्थानीय कृषकले सुन्तलाको माला लगाई दिएका हुन् । स्थानीय कृषि उत्पादनलाई बजारीकरणमा टेवा पुराउने उद्देश्यले सुन्तलाको माला लगाइदिएको बताए ।

जिल्लाको रेसुङ्गा नगरपालिकाको भाडगाउँ र धुर्कोट गाउँपालिकाको नयाँ गाउँ सुन्तला प्रसिद्ध ठाउँ हुन् । यहाँ उत्पादन भएका सुन्तला जिल्ला भित्र र जिल्ला बाहिर पाल्पा, बुटवल, पोखर, काठमाडौं लगायत ठूला शहरमा पुग्ने गर्दछन् ।

विष्टलाई स्थानीयले नयाँ गाउँमा पनि सुन्तलाको माला लगाई दिएका थिए । गाउँ गाउँमा पुग्ने क्रममा उनलाई विभिन्न सुझावहरू मतदाताले दिने गरेका छन् । सुन्तलाको माला लगाइ सकेपछि विष्टले कृषकले उत्पादन गरेका वस्तुले बजारीकरणमा ध्यान दिने बताए ।

उनले मानव जातिलाई बाच्नका लागि कृषि उपज अपरिहार्य भएकाले कृषिजन्य वस्तुको उत्पादन र बजारीकरणमा लाग्ने बताए । वास्तविक कृषकहरू बिचौलियाको मारमा परेर खास मूल्य नपाइरहेकाले अब त्यसो हुन नदिने विष्टको भनाइ छ ।

जनताका अपेक्षाहरूलाई पूरा गर्नको लागि सही ढंगले अगाडि बढ्ने उनले बताए । उनले यो निर्वाचनको परिणामले विगतमा जिल्लाको विकास र समृद्धिका लागि गरेका प्रतिबद्धतालाई अझ प्रभावकारी बनाउँदै पूर्णता दिने बताए ।

कतिपय ठाउँमा चुनाव जितेपछि गाउँमा फर्केर आउँदैन भन्ने मतदाताको गुनासो पनि रहने गर्दछ । तर विष्टले भने जसरी चुनावमा मत माग्न घरदैलो गरेका थिए त्यसै गरिनै मतदातालाई धन्यवाद दिन गाउँ गाउँमा पुगेका हुन् ।

निर्वाचित भएको घोषणापछि विष्टले मतदातालाई धन्यवाद दिने कार्यक्रम मंसिर १५ गतेसम्म रहेको नेकपा एमाले गुल्मी २ नम्बर क्षेत्रीय कमिटीले जनाएको छ । बिस्टसँगै एमालेबाट निर्वाचित प्रदेश सभा (क) मा निर्वाचित डिल्लीराज भुसाल र प्रदेश सभा (ख) मा निर्वाचित दिनेश पन्थी पनि मतदातालाई धन्यवाद दिन गाउँमा पुगेका छन् ।

विष्टले निर्वाचनको लगत्तै सबै क्षेत्रमा रुट बनाएर पुगेको प्रचार।संयोजक मदन खनालले बताए ।

जाँड पार्टी गरी सरकारी सम्पत्ति तोडफोड गर्नेलाई कारबाही माग गर्दै तालाबन्दी (भिडिओ)

कैलाली । मदिरा सेवन गरेर सरकारी सम्पत्ति तोडफोड गरेको विरोधमा राष्ट्रिय युवा संघ कैलालीद्वारा घोडाघोडी नगरपालिकाको कार्यकारी अधिकृत दीपक आचार्यको कार्यकक्षमा तालाबन्दी गरिएको छ ।

राष्ट्रिय युवा संघ कैलालीका अध्यक्ष शिवराज चन्द, घोडाघोडी नगर अध्यक्ष होम तामाङका युवाहरूले कार्यालय प्रमुखको कार्यकक्षमा तालाबन्दी गरेका हुन् । कार्यालयमै रहेको प्रमुख आचार्यलाई बाहिर निकालेर उनको कार्यकक्षमा तालाबन्दी गरिएको हो ।

शनिबार राति कार्यकारी अधिकृत आचार्यले सरकारी अवासमा मदिरा पार्टी आयोजना गरेका थिए । त्यहाँ घोडाघोडी नगरपालिकाका मेयर खडक रावत,वडा नम्बरका अध्यक्ष घनश्याम ओझा लगायत अन्य तीन जना वडाध्यक्ष रहेका थिए ।

मदिरा सेवनकै क्रममा वडाध्यक्ष ओझा र कार्यकारी अधिकृत आचार्य बिच विवाद बढेपछि वडाध्यक्ष ओझाले टेबल फोडेका थिए । घटना भएको २ दिन सम्म पनि नगरपालिकाले दोषीलाई कारबाही नगरेको भन्दै आज तालाबन्दी गरिएको राष्ट्रिय युवा संघ कैलालीका अध्यक्ष शिवराज चन्दले जानकारी दिए ।

‘सरकारी क्वाटरमा मध्यरातमा जाड पार्टी गर्ने विवाद गरेर सरकारी सम्पत्ति तोडफोड गर्नेलाई कारबाहीको माग गर्दै तालाबन्दी गरिएको हो’ अध्यक्ष चन्दले भने ‘माग सम्बोधन नभए हामी कडा आन्दोलन गर्न बाध्य हुनेछौँ ।’

तालाबन्दी पनि नगरपालिका बाहिर नाराबाजी समेत गरिएको थियो ।

सुनसरी ३ मा एमालेको क्लिन स्वीप, ४ मा अन्तिम मतगणना जारी

विराटनगर । सुनसरीको क्षेत्र नम्बर ३ मा पनि एमालले क्लिन स्वीप गरेको छ । सुनसरी ३ मा प्रतिनिधि सभामा एमालेका उमेद्वार भगवती चौधरी विजयी हुँदा प्रदेशतर्फ १ मा रोहित कार्की र २ मा रामदेव यादव विजयी भएका छन् ।

सुनसरी ३ मा एमालेकी भगवती चौधरीले ४० हजार ७८८ मत प्राप्त गरिन् । कांग्रेसका विजय कुमार गच्छदारले ३५ हजार ६०० मत प्राप्त गरे । चौधरीले ५ हजार १८८ मतको फराकीलो अन्तरमा गच्छदारलाई हराएकी हुन् ।

सुनसरी क्षेत्र नम्बर ३(२) को अन्तिम मत परिणामअनुसार रामदेव यादव विजयी भएका छन् । उनले नेपाली कांग्रेसका विन्देश्वर यादवलाई हराए । सुनसरी क्षेत्र नम्बर ३ को निर्वाचन कार्यालयका अनुसार रामदेवले १९ हजार ४७९ प्राप्त गरे । उनका निकटतम प्रतिस्पर्धी कांग्रेसका विन्देश्वर यादबले १८हजार ८९१ मत पाए ।

यसअघि प्रदेश सभा ३(१) मा भने एमालेकै रोहित बहादुर कार्की विजयी भएका छन् । उनले गठबन्धन तर्फबाट उम्मेदवार भएका माओवालीका सरस्वती पोखरेललाई दोब्बर मतले पराजित गरे । कार्कीले १८ हजार ६४१ मत पाए भने । पोखरेलले ९ हजार ४९८ मत पाएकी छन् ।

यसअघि सुनसरी क्षेत्र नम्बर १ र २ का प्रदेश र प्रतिनीधिसभाका क्षेत्रमा एमाले विजयी भएको थियो । सुनसरी १ बाट एमाले गठबन्धनका अशोक कुमार राई र २ बाट एमालेका भिम आचार्य विजयी भएका छन् । प्रदेश सभातर्फ १(१) मा रमेश बस्नेत, १(२) मा विजय राई विजयी भएका छन् । सुनसरी २(१) मा रेवती भण्डारी र २(२) मा रामप्रसाद मेहता विजयी भएका छन् ।

समानुपातिकको बाकसमा प्रत्यक्षका भोट सिला खोजिँदै, वसन्त नेम्वाङको जित उल्टिएला ?

काठमाडौं । अन्तिम मतगणना सकिएर ४७ मतको अन्तरमा विजयी घोषणा भएका नेकपा एमालेका वसन्त कुमार नेम्वाङको जितलाई उल्ट्याउन सकिन्छ कि भनेर समानुपातिकको मतगणना नसकिन्जेल आधिकारिक विजेता घोषणाबाट रोकिएको छ । नेम्वाङले विजयी भएको प्रमाणपत्र पाएका छैनन् ।

मत गणना सकिएर ४७ मतान्तरमा पाँचथरबाट प्रतिनिधि सभामा कांग्रेसका सहमहामन्त्री भिष्मराज आङदेम्वेलाई वसन्तले पराजित गरेका थिए । तर कांग्रेसले सो परिणाम अस्वीकार गर्दै समानुपातिकको बाकसभित्र पनि प्रत्यक्षका मतपत्र भेटिएको भन्दै सबै गणना सकिएपछि मात्र आधिकारिक घोषणा हुनुपर्ने माग राख्यो ।

अन्यत्र भन्दा फरक ढंगले निर्वाचन आयोगले पनि समानुपातिकको गणना सकिएपछि मात्र वसन्तलाई प्रमाणपत्र दिनू भन्यो ।

चुनाव जितेर पनि विजयी भएको प्रमाणपत्रबाट वञ्चित गरिएका नेकपा एमालेका नेता वसन्तकुमार नेम्वाङलाई निर्वाचन आयोगले विजयीको सूचीबाट पनि हटाएको छ ।

पाँचथरमा प्रतिनिधि सभा सदस्य पदको निर्वाचनमा वसन्तले ३२११० मत पाएर जित्दा कांग्रेसका भीष्मले ३२०६३ मत पाएका थिए ।

यता समानुपातिकतर्फको सबै मतगणना आजै साँझसम्म सकिने भएको छ । अहिलेसम्म समानुपातिकको बाकसमा सिला खोज्दा रुखका २३ र सूर्यका १७ मतपत्र भेटिएका छन् । यो कायम रहँदा वसन्तको जितको अन्तर ६ घटेर ४१ हुनेछ ।

पाँचथरको प्रदेशसभाका भने दुवै सीटमा गठबन्धनबाट नेकपा एस र माओवादी केन्द्रका उम्मेदवार विजयी भएका छन् ।

सुकुम्बासी नेता भन्छन्- बालेनले सच्चिएर वार्तामा बोलाए उहाँकै लागि राम्रो हुन्छ (भिडिओ)

काठमाडौं । वागमती विकास सभ्यता एकीकृत विकास समिति र काठमाडौं महानगरपालिका गएको सोमबार संयुक्त रुपमा थापाथलिस्थित सुकुम्बासी बस्ती हटाउन डोजर लिएर पुग्यो । तर, सिंगो बस्तीले नै प्रतिकार गरेपछि डोजर रित्तो हात फर्कियो ।

आज पनि थापाथलिस्थित सुकुम्बासी बस्ती तनावग्रस्त छ । आन्दोलित सुकुम्बासीहरुले मंगलबार महानगर घेराउ गरेका छन् । कोही माइतीघरमा अनसनरत छन् ।

थापाथलीको सुकुम्बासी बस्तीमा करिब ५० जिल्लाका नागरिक छन् । नेपाल बसोबास बस्ती संरक्षण समाजको तथ्यांकअनुसार सन् २००५ सम्म काठमाडौं उपत्यकामा साना-ठूला गरी ६४ सुकुम्बासी बस्ती छन् ।

यो बस्तीमा ०६९ सालमा तत्कालीन प्रधानमन्त्री डा. बाबुराम भट्टराई नेतृत्वको सरकारले पनि डोजर चलाएको थियो । वागमती सभ्यता एकीकृत विकास समितिको ०७३ को प्रतिवेदनअनुसार काठमाडौंमा एक हजार ४६५ परिवार सुकुम्बासी छन् । एडीबीको ठूलो आर्थिक सहयोगमा वागमति किनारका बस्ती हटाएर सफा वागमती बनाउने अभियानमा समितिले लामो समयदेखि काम गरिहरेको छ ।

सुकुम्बासी समस्या समाधानका लागि राज्यले दर्जन बढी आयोग मात्रै बनाएन, पटकपटक सुकुम्बासीहरुसँग वार्ता पनि गर्यो । तर, समस्या अहिले पनि ज्युँका त्युँ नै छ ।

बस्तीभित्र डोजर छिर्न खोजेपछि आन्दोलित बनेको सुकुम्बासी बस्तीको समस्या, पटकपटकको वार्ताका असफलता र राज्यको विदेभपूर्ण दृष्टिकोणमाथि हामीले राष्ट्रिय सुकुम्बासी मोर्चाको केन्द्रीय सल्लाहकार पदम बहादुर सिजापतिसँग कुराकानी गरेका छौं । आक्रोशमा रहेका उनले हाम्रो प्रश्नमा केही उत्तेजक जवाफहरु दिएः

भिडिओ:

अहिले तपाईंहरुले प्रतिकूल अवस्थाको सामना गरिरहनुपरेको छ । रातभर पनि जाग्राम बस्नुभयो । अहिले पनि आन्दोलनरत हुनुहुन्छ । डोजर फिरिसकेपछि पनि बस्तीमा फेरि डोजर पस्ला कि भनेर अझै पनि त्रसित हुनुहुन्छ ?

यस्तो घटना विगतमा पनि भएकाले त्रसित छौं । त्यसको प्रतिकारका लागि तयारी अवस्थामा पनि छौं । हामी जाइलाग्दैनौं, आइलागेपछि मर्न र मार्न तयार हुन्छौं । काठमाडौं महानगरका सुरक्षा प्रमुख राजु पाण्डेले जसरी पनि भत्काएरै छाड्ने भड्काउ अभिव्यक्ति दिएका छन् । त्यसका लागि हामी मोर्चावन्दी गरेर तयारी अवस्थामा रहनुपरेको हो । अहिले काठमाडौंका ६५ वस्ती सबै जागरक छन् ।

वार्ताको माध्यमबाट कम क्षतिका साथ यस समस्याको निकास निस्कन सक्दैन र ?

राज्यले जसरी दमन गर्छ, त्यसरी नै हामीले प्रतिकार गर्ने हो । प्राण रहेसम्म संघर्ष गर्ने हो । महिनौं दिन नै किन नलागोस् । राज्यले वार्ता, संवादबाट समाधानको प्रक्रिया अगाडि बढाएमा तयार छौं । हाम्रा लागि विगतका दिनहरुमा पनि भूमी आयोग गठन भएको छ । यसपटक पनि सरकारका तर्फबाट प्रधानमन्त्रीले जतिसक्दो चाँडो निकास निकाल्नु भन्दा बालेनजीले टेर्नु भएको छैन । खै किन हो, एडिबीको पैसा खान हो कि !

एडिबीले पहिलो किस्ता रकम दिइसकेको र दोस्रो किस्ताका लागि हानथाप भइरहेको, कार्यावधि सकिन लागेको र पैसा पचाउन विभिन्न चलखेल भइरहेको सुन्नमा आएको छ । त्यसकारण पनि हामी झनै सावधान भएका छौं । दातृ संस्थाले दिएका बजेट कुम्ल्याएर राजनीतिक नियुक्ती लिएकाहरुले घर जाने सोचेका छन्, त्यो हुन हामी दिन्नौं ।

तपाईंहरु विगत लामो समयदेखि आन्दोलनरत हुनुहुन्छ । राज्यसँग पटकपटक वार्ता पनि गर्नुभयो । तर, ती वार्ता असफल हुनुको पछाडि सुकुम्बासी बस्तीका प्रतिनिधि नै दोषी हुन् भन्छन् नि ?

वार्ताका बेला साथीहरुबाट समस्या भएकै हो । त्यसलाई हामी स्वीकार्छौं । को सुकुम्बासी हो र को होइन, यसमा समस्या छैन । हामीलाई राज्यले तीन वर्गमा विभाजन गरेको छ । कत्ति पनि नहुनेलाई कसरी व्यवस्थापन गर्ने, अलिकति हुनेलाई कसरी व्यवस्थापन गर्ने भनेर भूमि आयोगमा बकाइदा उल्लेख छ । त्यहाँ हाम्रै प्रतिनिधि मोतिराम लामा भूमि आयोगलाई सहयोग गरिहरनुभएको छ ।

यस समस्याको दीर्घकालीन समाधानका लागि हामीले भूमि आयोगलाई सहयोग गरिरहेका छौं । यहाँ खोलाको बाटो फुटाउने ठाउँ पनि छ । शंखमुलमा दुवैतिर बाटो खुलिसकेको छ । अन्य ठाउँमा पनि व्यवस्थापन गर्न सकिने ठाउँ छन् । राज्यको तर्फबाट यसरी जाऔं न त भन्दै गर्दा सहजै निकास निस्कन सक्छ ।

सुकुम्बासी आन्दोलन उठाउने नेतृत्वमा आएको भ्रष्टीकरण र विचलनका कारण पनि खास सुकुम्बासीको माग सम्बोधन नभएको भनिन्छ नि । यो सत्य हो ?

हामीलाई आपसमा फुटाएर शासन गर्न खोज्नेहरु धेरै छन् । भर्खरैको निर्वाचन पनि हेर्न सक्नुहुन्छ । यो निर्वाचनमा पनि हामीलाई विभिन्न लोभलालच देखाइयो । विभिन्न दल आए । हामीलाई भोट हाल्नुस्, समाधान गर्छौंं भने । नीति तथा कार्यक्रममा ल्याएर, पार्टीका घोषणापत्रमा लेखेर हामीलाई भोट हाल्नुभएमा यहीँ व्यवस्थापन हुन्छ भनेका थिए । अहिले ठीक उल्टो भएको छ । हामीले त्यो बुझ्दैनौं ।

हाम्रा साथीहरुबाट विचलन आउने, सुकुम्बासीलाई अराोप लगाउने लगायतका नाजायज हल्ला फिँजाइन्छ । त्यो सामन्त वर्गले खेल्ने खेल हो । तपाईंको नेता यस्तो हो भन्यो, उस्तो हो भन्यो । जुधाइदियो । र फाइदा लियो । तर विचलन आउने घुसखोरी टिम हामीसँग छैन ।

सुकुम्बासी मुद्दाको कुरा भोट बैंकका रुपमा चुनावका बेला मात्रै सतहमा आएका कारण पनि यस्तो स्थिति आएको हो ?

हो, त्यसलाई हामीले एकदमै महसुस गरेका छौं । लोभ देखाएर, हाम्रो पार्टीले जित्दा ग्यारेन्टी भनेर हामीलाई प्रयोग गरेका छन् । अनि चुनाव जितेको भोलिपल्टबाट फोनै नउठ्ने गरेको छ । चुनाव अघिल्लो दिन चाहिँ मिस्डकल गर्दा पनि फर्काउने, आफैं फोन गर्ने देखियो । उपत्यकामा रहेका हाम्रा सबै ठाउँमा बुझ्दा थुप्रो भ्रमको खेती गरेर राजनीतिक दलहरुहरुले प्रयोग गरेका छन् । अनि राज्यले चाहिँ वार्तामार्फत् निकास खोज्नुको साटो अनेक सूचना टाँसेर हामीमाथि सूचनाको आतंक फैलाइरहन्छ । यस्तै गरिरहने हो भने आत्मघाती बम पड्काउने दिनको सुरुवात यही सुकुम्बासी बस्तीबाट हुनेछ ।

चुनावअघि नेताहरु भोट माग्न आइपुगेका थिए । चुनाव सकिनासाथ डोजर लिएर आइपुगे । बस्तीमा भोट माग्न त तपाईंहरु नै आफ्नो पार्टीको उम्मेदवार लिएर आउनुभएको थियो होला । तर, फेरि यही वस्तीमा राज्यले डोजर लिएर आइपुग्नुमा कहीँकतै तपाईंहरुकै कमीकमजोरी पो छन् कि ?

त्यस्तो कमजोरी भएको छैन । सरकारका मन्त्री, वहालवाला प्रदेश मन्त्रीसँग सम्पर्क गर्दा उहाँहरु लागिरहनुभएको छ । प्रधानमन्त्रीले बालेन जीलाई फोन गर्नुभएको थियो । तीन तहमध्ये स्थानीय सरकार बालेनजीको नेतृत्वमा छ । तर उहाँ हिजोको श्री ३ सरकारभन्दा निरंकुश भएर निस्कनुभयो । त्यसलाई तह लगाउन पनि हामीलाई आउँछ । उहाँले सच्चिएर, वार्तामा बोलाएर निकास निकाल्ने प्रयास गर्नुभयो भने सबैका लागि राम्रो होला । उहाँका लागि पनि राम्रै होला ।

यस्तै घमण्ड गरेर जान्छु, सक्छु भनेर सोच्नुभयो भने यो हाम्रो बास त भत्काउन सक्नुहोला । तर हाम्रो हृदयको घाउ भत्किने छैनन् । हामी सबै एक मत भएर उहाँको घरमै पनि आक्रमण हुन सक्छ । उहाँको अफिसमा पनि आक्रमण हुन सक्छ । त्यो भएकाले अब उहाँले तर्साएर, पटाका पड्काएर तर्सिन्छ भन्ने दिवास्वप्न नदेखे हुन्छ । उहाँ सच्चिएर जे भयो, कमजोरी भयो भनेर सुकुम्बासीका प्रतिनिधिसँग वार्ता संवादबाट जानुपर्छ । हिजो उहाँले नै वार्ता संवादबाट अगाडि बढाउनुपर्छ भनेर भूमि आयोगको सम्झौतापत्रमा हस्ताक्षर गर्नुभएको छ । एकातिर देखउने दाँत छ, अर्कातिर दमनको नीति छ । यो नीति हामीलाई सह्य छैन ।

महानगरले फुटपाथ हटाए जसरी सहजरुपमा वर्षौंदेखि बस्दै आएको वस्ती हटाउने प्रयास गर्नुको पछाडिको कारण के हुन सक्ला ?

उहाँले सोच्नुभयो, यिनीहरुको फुटपाथे जतिको संगठन पनि छैन । यसो पटाका पड्काएर प्रहरी देखाइदिए भाग्छ भनेर छोटो सोचले आउनुभएको छ । त्यसरी नसोचे हुन्छ । यसको स्थायी समाधान कसरी गर्न सकिन्छ ? त्यो सोचका साथ आउनुभयो भने महानगरको हिरो नै बनाएर राखौंला । यस्तै दमन भए त्यसको सशक्त प्रतिकार हुनेछ ।

हिजो तपाईंहरु हिंसात्मक आन्दोलनमा उत्रिनुभयो । महानगरका सुरक्षाप्रमुख एसपी राजु पाण्डेको टाउकोमा ढुंगा लागेर चोट नै लाग्यो । अबका दिनमा त हिंसात्मक बाटो रोज्नुहुन्न होला नि तपाईंहरु ?

उहाँ त ‘मलाई हान्’ भन्दै सीधै आउनुभयो । किनभने उहाँले अलिकति चोट देखाएपछि वागमतीले बीमा पैसा दिएको होला । यति पैसा दिन्छु, चोट लिएर आइज भनेको होला । उहाँ अत्यन्त हिरो हुन खोज्नुभयो । हामीकहाँ दबंग शैली देखाउँदै आउनुभयो । हामीसँग पनि झारफुक गर्नेहरु छन् । उहाँलाई घुच्चुकमा ढुंगाले हान्दा लागेको होइन, चामलको दुईचार गेडो झारफुक गर्दा लागेको हो । ढुंगाले हान्दा त मरिहाल्थे नि मान्छे । डोजर आतंक रोक्नका लागि हामीले धेरै पहल गर्यौं । देशको प्रधानमन्त्री हाम्रो पार्टीका हुनुहुन्छ । उहाँसँग विन्ती गर्यौं । उहाँले किन यस्तो भयो भनेर फोन गर्दा फोन काटेको भन्ने म्यासेज पाएपछि हामी आक्रोशित भएका हौं ।

०००

 

 

ओलीको मधेस मिसनका सारथी रघुवीर- एमालेलाई पहिलो शक्ति बनाए, ‘शेर ए धनुषा’ ब्युँताए

काठमाडौं । कुनै समय नेकपा एमालेलाई मधेस विरोधी पार्टीको रूपमा चित्रण गरिन्थ्यो। तर, अहिले परिस्थिति फेरिएको छ। मंसिर ४ मा भएको प्रतिनिधि र प्रदेशसभाको निर्वाचनबाट एमाले मधेशमा पहिलो शक्तिको रूपमा उदाएको छ।

मधेस प्रदेशका ३२ सीटमध्ये एमालेले ९ सीट जितेको छ भने, प्रदेशसभाको ६४ सीटमध्ये १५ सीटमा जित हासिल गरेर पहिलो पार्टीको रूपमा स्थापित बनेको हो।, समानुपातिकतर्फ पछिल्लो मतपरिणाम अनुसार कांग्रेसभन्दा थोरै मतले मात्रै पछाडि परेको छ।

२०७४ को निर्वाचनमा बाम गठबन्धन हुँदा समेत एमालेले २ सीट मात्रै जितेको थियो। तर, अहिले मधेस दलहरुको अस्थिर चरित्र र कांग्रेस गठबन्धनबाट गएपछि तीव्र असन्तुष्टिको कारणले एमालेलाई मौका मिलेको छ।

मधेसमा एमालेलाई पहिलो शक्तिको रूपमा स्थापित गर्ने केपी ओलीको आक्रामक रणनीतिका मुख्य सूत्रधार हुन् रघुवीर महासेठ। मधेश प्रदेशका एमाले इन्चार्ज समेत रहेका महासेठ धनुषा ४ बाट निर्वाचित भए। उनले कांग्रेसका सहमहामन्त्री समेत रहेका महेन्द्र यादवलाई १२४ मतले हराए।

महासेठले ३२ हजार २३६ मत ल्याउँदा यादवले ३२ हजार ११२ मत प्राप्त गरे। २०७४ को चुनावमा पनि यो क्षेत्रबाट रघुवीरले महेन्द्रलाई हराएका थिए। उनी मात्रै नभएर उनको श्रीमती जुली महतो पनि धनुषा ३ बाट विजयी भएकी छन्। जसलाई हेमबहादुर मल्ला र शारदा मल्लपछि शेर ए धनुषाको रूपमा उदाएको जोडी भनिएको छ ।

रघुवीरदम्पतीको एकसाथ जित- ३६ वर्षअघिको ‘शेरे धनुषा’ सम्झाए

एमालेका पुराना नेताहरू सीतानन्दन राय, जितेन्द्रदेव, रामचन्द्र झा, महेन्द्रराय यादवसहितले पार्टी छाडेर हिँडेपछि महासेठले बिस्तारै एमालेमा आफ्नो प्रभाव देखाउन थाले । मधेसमा एमालेको शक्तिको रूपमा आफूलाई उभ्याएका महासेठ ०५४ सालमा एमाले फुट्दा वामदेव नेतृत्वको मालेतिर लागेका थिए।

नेता महासेठ २०५९ सालको सातौँ महाधिवेशनबाट केन्द्रीय सदस्य बनेका थिए। आठौँ महाधिवेशनमा केन्द्रीय सदस्य समेत हारेका महासेठ नवौँ महाधिवेशनमा एमालेको सचिव पदमा उठे। तर, त्यहाँ पनि सफल हुन सकेनन्।

२०६४ सालमा भएको संविधानसभा निर्वाचनमा धनुषा ४ बाट चुनाव लडेपनि पराजय व्यहोरे। तर, धनुषा ५ बाट निर्वाचित डा. रामवरण यादव नेपालको प्रथम राष्ट्रपति बनेपछि उनले अर्को मौका पाए।

यादव राष्ट्रपति बनेपछि रिक्त पदमा उपनिर्वाचन भएपछि उनले रामवरणका छोरालाई हराएर संसद्को यात्रा समेत तय गरे। उनी २०६७ मा झलनाथ खनाल नेतृत्वको सरकारको सिँचाइमन्त्री समेत बने।

त्यसपछि लगातार २०७० र ०७४ को चुनाव जितेको महासेठ मधेसमा एमालेको बलियो शक्तिको रूपमा स्थापित बन्न पुगे। ०७४ को निर्वाचन लगत्तै बनेको ओली सरकारमा उनले भौतिक पूर्वाधार तथा यातायात मन्त्रीको जिम्मेवारी पाए।

तर, २०७६ मंसिरमा ओलीले मन्त्रिपरिषद् पुनर्गठन गर्दा बाहिरिएका थिए। पार्टीभित्रको विवादको क्रममा केही समय अलमलमा परेका महासेठ ओलीले जुलीकुमारीलाई महिला बालबालिका तथा ज्येष्ठ नागरिक मन्त्रालयको जिम्मेवारी दिएपछि ओलीको पक्षमा बलियोसँग उभिए ।

पार्टीभित्रको विवाद र गुट परिवर्तनकोबीचमा ओलीले आफ्नो विश्वासपात्र प्रदीप ज्ञवालीलाई हटाएर उपप्रधानसहित परराष्ट्र मन्त्रालयको जिम्मेवारी सुम्पिएपछि उनी झन् नजिक भएका थिए। महासेठलाई विश्वास गरेर ओलीले प्रदेश इन्चार्ज बनाएकोमध्ये उनले सातै वटा प्रदेशमध्ये आफूलाई सफल कमान्डरको रूपमा दर्ज गरे।

मधेसमा महासेठले एमालेको नेतृत्व विस्तार गर्दै गर्दा माओवादी केन्द्रबाट आएका प्रभु साहसँग अन्तर्विरोध थियो तर, निर्वाचनको मुखमा पार्टीलाई धोखा दिएर स्वतन्त्र उम्मेदवारी दिएर आफ्नो पक्षबाट छुट्टै उम्मेदवारी दर्ता गरेर साह बाहिरिए ।

भलै, सत्ता गठबन्धनको साथ पाएका शाहले पनि ३ बाट निर्वाचन जितेका छन्। उनी अब फेरि माओवादी नै फर्किनेबारे चर्चा चलेको छ। तर, निश्चित छैन। साहसँगै एमाले बनेका ज्वाला कुमारी साह,रामचन्द्र मण्डल,मोहम्मद समीर लगायतले भने एमालेबाटै जित निकालेका छन् ।

मधेसमा एमाले फेरि शून्यमा झार्ने साहको प्रयासलाई असफल पार्दै महासेठले एमालेलाई पहिलो पटक मधेश प्रदेशकै पहिलो शक्तिको रूपमा खडा गरे। महासेठले कमान्ड सम्हालेको मधेशमा पार्टीलाई शक्तिमा फर्काउन अध्यक्ष ओलीले पनि चलाखीपूर्ण भूमिका खेले।

सत्ता गठबन्धनबाट जसपाले आफ्नो कित्तामा ल्याएपछि एमालेलाई केही हदसम्म फाइदा पुग्यो। ओली आफैंले डिल गरेर मधेसका प्रभावशाली व्यक्तिहरूलाई एमालेमा प्रवेश गराएर टिकट दिए । उमाशङ्कर अरगरिया धनुषा २ मा प्राविधिक कारण हारे पनि अरू ओलीले अपेक्षा गरेका पात्रले जिते ।

जसपा कांग्रेस नेतृत्वको सत्ता गठबन्धनमा हुँदा मधेसका ३२ सीटमा पछि परेको एमाले जसपालाई बाहिर ल्याएपछि समीकरण फेरिएको थियो।

यस्तै, मधेशमा सत्ता गठबन्धनले नागरिकता विधेयकलाई देखाएर कमजोर पार्न खोजेको थिए। तर, ओलीले गठबन्धनको नागरिकता विधेयकलाई पनि ढुस पारेपछि एमाले बलियो शक्तिको रूपमा उदाउन सफल भयो। जुन नागरिकता विधेयकलाई देखाएर मधेसमा सत्ता गठबन्धनले एमालेलाई पराजित गर्न खोजेको थियो,उल्टै गठबन्धनलाई एमालेले पराजित गरेको छ ।

मधेश केन्द्रित दल जसपा र लोसपा कमजोर बनेपछि एमाले मौकाको सदुपयोग गरेको छ। एमाले पहिलो शक्ति बनेसँगै मधेशमा सिके राउत नेतृत्वको जनमत पार्टीको पनि उदय भएको छ। ओली नेतृत्वको सरकारले नै शान्तिपूर्ण राजनीतिमा ल्याएका राउत पनि एमालेप्रति लचिलो छन्।

डिसेम्बर फल्सको पहिलो गीत सार्वजनिक

काठमाडौं । अभिनेता आर्यन सिग्देल र अभिनेत्री उपासना सिंह ठकुरीको मुख्य भूमिका रहेको एक्सन—लभ स्टोरी सिनेमा ‘डिसेम्बर फल्स’को पहिलो गीत सार्वजनिक गरिएको छ ।

सोमवार राजधानीमा आयोजित एक कार्यक्रमका बीच ‘फकाउनै जानिनँ’ बोलको लोकलयको गीत रिलिज गरिएको हो ।

दीपक शर्माको शब्द रचना तथा संगीत रहेको गीतमा निशान भट्टराई र मेलिना राईको स्वर सुन्न सकिन्छ । रामजी लामिछानेको कोरियोग्राफी सार्वजनिक गीतमा हेर्न सकिन्छ ।

भक्तपुरको दरबार स्क्वायरमा छायांकन गरिएको गीतमा फिल्मका मुख्य अभिनेता आर्यन सिग्देल र अभिनेत्री उपासना सिंह ठकुरी फिचर्ड छन् । गीतमा उनीहरूको केमेस्ट्री जमेको छ । गीतको अडियो र भिडियो दुवै पक्ष उत्कृष्ट लाग्छन् ।

गीत रिलिज कार्यक्रममा आर्यनले अहिलेको सिनारियोमा आफ्नो करिअरको उत्कृष्ट गीत ‘फकाउनै जानिनँ’ रहेको बताए ।

‘पहिला र अहिलेमा गीत बन्ने सिनारियो अलग छ । अहिलेको सिनारियोमा यो मेरो करिअरको उत्कृष्ट गीत भन्न मिल्छ,’ उनले भने ।

आर्यनले आफूलाई दर्शकले लभ स्टोरी सिनेमामा मन पराएकाले ‘डिसेम्बर फल्स’मा पनि त्यो चिज नछुटेको र दर्शक निराश नहुने दाबी गरे ।

सिनेमाकी मुख्य अभिनेत्री उपासनाले आर्यन सिग्देलसँग काम गर्न पाउँदा धेरै कुरा सिक्न पाएको बताइन् ।

उनले भनिन्, ‘आर्यन सरको आँखाले नै अभिनय गर्छ । उहाँ अनुभवी भएकाले पनि होला, सेटमा हामी हाँसीमजाक गरिरहेका हुन्थ्यौँ अनि एक छिनमा सिनेमामा रुने सिन हुँदा आर्यन सरले मज्जाले गर्दिनु हुन्थ्यो । मलाई चाहिँ अलि समय लाग्थ्यो । उहाँसँग काम गर्दा एकदमै सहज महसुस पनि भयो ।’

नेपाली मूलका भारतीय निर्देशक प्रविण झाद्वारा निर्देशित तथा महेश आर गुप्ताको छायांकन रहेको सिनेमालाई रामप्रसाद रिजालले निर्माण गरेका हुन् । उनले यसअघि ‘वान डे, कसम, धुवाँ यो नशा र कायरालगायतका सिनेमा निर्माण गरिसकेका छन् ।

‘डिसेम्बर फल्स’ उनको पाँचौँ सिनेमा हो । सिनेमामा सुमन थापा, नरेश भट्टराई, सलोन बस्नेत, शिवहरि पौडेल, नागेन्द्र रिजाल, शिशिर राणाको पनि अभिनय छ ।

धरानबाट समाजवादको सुरूवात भइसक्यो : हर्क साम्पाङ

काठमाडौं । धरान उपमहानगरपालिकाका मेयर हर्क साम्पाङले समाजवादको सुरुवात धरानबाट भइसकेको बताएका छन् । उनले उपमहानगरले किनेका दुई वटा डोजरका तस्बिरहरु सामाजिक सञ्जालमा राख्दै यस्तो बताएका हु्न् ।

उनले सर्वसाधारणलाई जेसिबी आवश्यक परेमा नगरपालिकालाई सम्झन पनि आह्वान गरेका छन् । उनले फेसबुकमा लेखेका छन्, ‘आइन्दा जेसीबी लगाउन परे नगरपालिकालाई सम्झनु । तपाइँले तिरेको पैसा नगरको कोषमा जम्मा हुन्छ कुनै व्यक्तिको गोजीमा होइन । समाजवादको शुरुवात धरानबाट भइसक्यो ।’

उनले फेसबुकको हिजोको एउटा स्टाटसमा डोजरमा आफू चढेर अब निर्माणका लागि अघि बढेको बताएका छन् ।

त्यस्तै, हर्कले पूर्वमेयरहरुमाथि कटाक्षसमेत गरेका छन् । पूर्व मेयरहरुले जस्तै चाहेको भए म पनि एक करोडको गाडी किन्थेँ तर मैले धरानलाई एक करोडको यी हलगोरु जोडिदिएको छु’, उनले अगाडि लेखेका छन्, ‘यसमा पनि मेरो विरोध भइराखेको रहेछ । जति कराउँछौ कराऊ । छेरुन्जेल कराउँदा नि केही फरक पर्दैन ।’

कतार विश्वकपमा सबैभन्दा बढी खेल हेरेर विश्व कीर्तिमान बनाउन कारमा दौडिरहेका बुक्साइसा

दोहा। कतार विश्वकपमा मोहसिन अब्दुल्ला बुक्साइसालाई भ्याई नभ्याई छ। उनका लागि विश्वकपका खेल भइरहेका ८ वटा रंगशालाको दौडधुप दैनिकी जस्तै बनेको छ।

कतारी नागरिका बुक्साइसा कुनै एक विश्वकपमा रंगशाला पुगेर सर्वाधिक खेल हेर्ने विश्व कीर्तिमान बनाउन लागि परेका छन्। यसअघि यस्तो कीर्तिमान ३१ खेलको छ। थुलानी कोबोले सन् २०१० मा दक्षिण अफ्रिकामा आयोजित विश्वकपका ३१ खेल रंगशालामै पुगेर हेर्दै विश्व कीर्तिमान बनाएका थिए।

बुक्साइसाले कतार विश्वकपका ६४ खेलमध्ये ४२ खेलको टिकट लिएका छन्। उनलाई थाहा छ, टिकट लिएका सबै खेल हेर्न गाह्रो छ। उनी कम्तिमा पनि ३२ खेल हेरेर नयाँ विश्व कीर्तिमान बनाउने प्रयाशमा छन्।

गल्फ टाइम्स डटकमका अनुसार कतारको पब्लिक वर्क्स अथोरिटीमा कार्यरत बुक्साइसा आफ्नो कारमा चढेर रंगशालाको दौडधुप गरिरहेका छन्। ‘ मेरो योजना ३२ वा सोभन्दा बढी खेल हेर्ने हो’, उनले भनेका छन्, ‘ यो कीर्तिमान कतारका लागि हुने छ। तोडिन गाह्रो हुने नयाँ कीर्तिमान बनाएर म मेरो देशका लागि थप योगदान गर्न चाहन्छु।’

बुक्साइसाले हेरेका खेलमा फोटो र भिडियो पनि लिने गरेका छन् जसले उनलाई गिनिज बुक अफ वर्ल्ड रेकर्ड्समा सजिलो हुने छ। बुक्साइसाले कतारले विश्वकप आयोजना गर्ने अधिकार पाएदेखि नै आफुलाई उक्त विचार आएको बताएका छन्। उनले भविस्यमा विश्वकप इतिहासमै सबैभन्दा बढी खेल हेर्ने कीर्तिमान बनाउने योजना पन रहेको सुनाएका छन्।

Pages